ՀԱՅՏԱՐԱՐՈՒԹՅՈՒՆ

 

Հայագիտական հրատապ և կարևոր աշխատությունների թարգմանության ու հանրայնացման նպատակով դրամաշնորհների տրամադրման մրցույթի

 

Հայագիտական ուսումնասիրությունները ֆինանսավորող համահայկական հիմնադրամը կազմակերպում է հայագիտական հրատապ և կարևոր աշխատությունների թարգմանության ու հանրայնացման նպատակով 2024 թ. դրամաշնորհներ տրամադրելու մրցույթ։

Ընդունվում են հայտեր հետևյալ ուղղություններով՝

1. հայագիտության հիմնահարցերին նվիրված հիմնարար աշխատությունների թարգմանություններ,
2. հայագիտության առանձին գիտաճյուղերում կատարված հրատապ և կարևոր աշխատությունների թարգմանություններ,
3. հայոց պատմության կեղծարարության ու հայկական մշակույթի յուրացման փորձերի բացահայտմանը և դրանց սնանկության հիմնավորմանը միտված աշխատությունների թարգմանություններ,
4. Հայաստանի, հայ ժողովրդի, հայոց պատմության իրողությունների և հայկական մշակույթի ճանաչելիության բարձրացմանն ու հանրահռչակմանը նպաստող աշխատությունների թարգմանություններ,
5. այնպիսի թարգմանություններ, որոնք արտերկրում հայագիտությանն առնչվող շրջանակներին հասանելի կդարձնեն հայագիտական՝ մինչ այդ անհայտ կամ անհասանելի ուսումնասիրություններ։

 

Մրցույթին պետք է ներկայացվեն հայերենով արդեն հրատարակված և թարգմանության պատրաստ աշխատություններ։

 

Մրցույթին չեն կարող ներկայացվել՝

• փաստաթղթերի ժողովածուներ,
• գիտաժողովի նյութերի ժողովածուներ,
• գիտական հանդեսների (պարբերականների) համարներ,
• նախորդ մրցույթներին մասնակցած և ֆինանսավորման չերաշխավորված աշխատություններ։

 

ՀՀ գիտական կազմակերպություններում և բարձրագույն ուսումնական հաստատություններում զբաղված ու գիտական աստիճան ունեցող գիտական աշխատողները, վերոհիշյալ ուղղություններով հետազոտությունների հրատարակության համար Հայագիտական ուսումնասիրությունները ֆինանսավորող համահայկական հիմնադրամից աջակցություն ակնկալելու դեպքում, պետք է մինչև ս.թ. հոկտեմբերի 22-ը hիմնադրամի էլ. հասցեին (armenianstudiesfoundation@gmail.com) ուղարկեն համապատասխան հայտեր՝ երաշխավորված գիտական կազմակերպության կամ բարձ­րա­գույն ուսումնական հաստատության գիտական խորհրդի կողմից, ինչպես նաև երկու երաշխավորական կարծիք։

 

Հայտերը ներկայացվում են հայերեն, ռուսերեն կամ անգլերեն լեզուներով (վերջին երկու լեզուներով հայտերը ձևակերպելու դեպքում՝ նաև հայերենով), էլեկտրոնային և թղթային տարբերակներով:

 

Հայտի թղթածրարը՝ պահանջվող բոլոր փաստաթղթերով (ստորագրված և կնքված բնօրինակներ) էլեկտրոնային հայտը ուղարկելուց հետո մեկ շաբաթվա ընթացքում պետք է ներկայացվի Հիմնադրամի աշխատակազմին (Մարշալ Բաղրամյան պող. 24, ՀՀ ԳԱԱ նախագահության շենք, 1-ին հարկ, սենյակ 29)։

 

Հայտերի ներկայացման վերջնաժամկետն է՝

-         էլեկտրոնային տարբերակով՝ 22.10.2024 թ.,

-         թղթային տարբերակով՝ մինչև 29.10.2024 թ.:

 

Նշված պահանջների չհամապատասխանող, թերի և հայտարարված թեմաներից դուրս հայտերը չեն քննարկվելու:

 

Պահանջներին համապատասխան ներկայացված հայտերի՝ մրցույթի թեմաներին համապատասխանության հարցը քննարկվելու է այդ նպատակով ստեղծված մասնագիտական խորհրդում: Խորհրդի դրական եզրակացություն ստացած յուրաքանչյուր հայտ գնահատելու են երկու փորձագետներ՝ հատուկ մշակված հարցաշարերի միջոցով։ Հիմնադրամի կայքում մրցույթի արդյունքների հայտարարումից հետո ֆինանսավորման երաշխավորված հայտերի հայտատուների հետ կնքվելու են դրամաշնորհի պայմանագրեր:

 

Մրցույթի արդյունքները հայտատուներն իրենց հայտի մասով կարող են բողոքարկել արդյունքների հրապարակումից հետո հինգ աշխատանքային օրվա ընթացքում։

 

Մրցույթի արդյունքները հայտարարվելու են 2024 թ. նոյեմբերի վերջին:

 

 

Մասնակիցները մրցույթի վերաբերյալ պարզաբանումներ կարող են ստանալ աշխատանքային օրերին (ժամը 09:00-17:00)՝ Հիմնադրամի էլ. հասցեին ուղարկված նամակի միջոցով կամ զանգելով +(374 10) 581891 հեռախոսահամարին։

 

Մրցույթի հայտը լրացնելու ուղեցույցը կարող եք ներբեռնել հետևյալ հղումով՝

http://haygithimnadram.am/materials.php?langid=1

 

 

Հայագիտական ուսումնասիրությունները ֆինանսավորող

համահայկական հիմնադրամ